Milani është rikthyer të jetë i madh edhe në Europa League, pasi ka mposhtur Ludogorets në transfertë me rezultatin 0-3. Një fitore mjaft e rëndësishme e cila ka bërë që kuqezinjtë ta shohin veten me një këmbë në fazën e 1/8-ve. Pjesa e parë u zhvillua në nivele të barabarta, ku vetëm në minutën e fundit Cutrone bën heroin dhe dërgon topin në rrjetë, për të çuar ekipin në qetësi në dhomat e zhveshjes.
Pas pushimit Milan luajti me qetësi dhe vetëm një shtyllë e Dyakov ka rrezikuar seriozisht portën e Donnarumma-s. Në minutën e 64’ erdhi edhe goli i dytë nga pika e bardhë e penalltisë nga Ricardo Rodriguez. Në fund ishte Borini ai që vulosi gjithçka që në ndeshjen e parë. Një fitore e rëndësishme për Milan, që tani mund të luajë me qetësi ndeshjen e kthimit në San Siro.
Spektakël dhuroi edhe supersfida e luajtur në “Signal Iduna Park”, med Dortmund dhe Atalantës, e cila përfundoi 3-2 për vendasit. Gjithçka do të jetë e hapur për ndeshjen e kthimit në Itali dhe me siguri spektakli do të jetë i garantuar. Ishin vendasit ata që kaluan të parët në avantazh me golin e Schurrle. Por pas pushimit dopieta e Ilicic përmbysi gjithçka deri në momentin kur Michy Batshuayi më pas riktheu avantazhin e merituar për Dortmund.
Arsenal e kthen në shëtitje përballjen me Ostersunds, në Suedi. Diferenca të mëdha kanë rënë në sy mes dy ekipeve. Wenger, ashtu siç kishte paralajmëruar kishte zbritur në fushë një formacion të fortë, dhe jo të përbërë nga rezervat si në ndeshjet e grupit. Ai e mori seriozisht kundërshtarin dhe u shpërblye me një fitore 3-0 falë golave të Monreal, autogolit të Papagiannopoulos dhe Ozil në pjesën e dytë. Me këtë rezultat Arsenal e ka thuajse të sigurt kalimin në fazën tjetër.
Nice pësoi një humbje shokuese ndaj Lokomotiv Moscow brenda me rezultatin 3-2. Megjithëse Balotelli shënoi një dopietë për t’i dhënë avantazhin e dyfishtë vendasve, rusët janë përgjigjur me tripletën e Fernandes. Gjithsesi Nice nuk i ka humbur shpresat dhe do t’ia vërë fajin Coly-t për këtë disfatë pasi ishte ai që la ekipin e tij me një lojtar më pak.
