Ministrja e Energjitikës dhe Infrastrukturës, Belinda Balluku, deklaroi prerazi në Kongresin e PS, së punimet e tij shënojnë një kthesë të rëndësishme në aspektin politik, duke qenë se mblidhet në një situatë politike të pazakontë. Ajo ka sjellë në fokus djegien e mandateve nga ana e opozitës. Duke qëndruar në të njëjtën linjë, ministrja shtoi se nuk do të ndalen, por do të punojnë për mirëqënien e shqiptarëve.
“Sot në këtë Kongres shënohet një kthesë e rëndësishme në aspektin politik. Situata politike kur mblidhet ky Kongres, është e veçantë. Opozita përballë frikës së humbjes në zgjedhje, ka vendosur të djegë mandatet. Ne na shqetëson akti i tyre, por nga ana tjetër, ne vazhdojmë punën për t’i shërbyer qytetarëve.
Qytetarët nuk e harruan situatën energjetike kur ne e morëm qeverinë. Ishte një kohë kur energjia trajtohej si mall pa Zot. 85 miliardë lekë ishte vlera e borxhit ndaj të tretëve. Të ardhurat nga arkëtimet sot kanë arritur në 95%, duke u afruar me standardet e BE, dhe po hartojmë një model të ri në tregun e energjisë. Reduktuam çmimin e energjisë për konsum familjar. Sot çdokush paguan aq sa konsumon”, u shpreh Balluku.
