Kreu i Grupit Parlamentar të Partisë Socialiste, Taulant Balla i ka bërë thirrje opozitës së bashkuar që të heqë dorë nga pengimi dhe bllokimi i Bashkive, teksa solli në vëmendje rastin më të fundit me Bashkinë e Kamzës.
I ftuar në “News24”, numri dy i Partisë Socialiste deklaroi se Lulzim Basha i kishte dhënë urdhër ditën e sotme kryebashkiakut të Kamzës, Xhelal Mziut, që të mos i lironte zyrën kryebashkiakut të ri, Rakip Sulit.
Duke marrë shkasë nga situata aktuale politike, Balla ka kujtuar kohën në të cilën ishte pjesë e kabinetit Fatos Nano, ku deklaroi se 3 muaj para se të dorëzonte pushtetin, e gjithë qeveria “Nano” kishte bërë një punë intensive për përgatitjen e dosjeve.
“PD të heqë dorë nga urdhrat. Më thanë sot se Mziu është urdhëruar nga Basha për të mos liruar zyrën. Kam punuar na kabinetin e Fatos Nanos dhe them që 3 muaj para dorëzimit të pushtetit kanë qenë intensive për përgatitjen e dosjeve. Ky është një mandat i rëndësishëm dhe i veçantë, pasi edhe zgjedhjet e 30 qershorit ishin të veçanta. Ishin përgjegjësi e madhe për ne. Niveli i papastërtive ishte i tmerrshëm, ka disa punë konkrete. PD në gjithë këto vite nuk arriti të kishte një model të vetin të qeverisjes vendore. Ne kemi plot modele të suksesshme të qeverisjes dhe jam shpresëplotë se në 60 bashkisë ku PS qeveris do mundohemi ta zgjerojmë këtë model të mirë. Këto modele na kanë bërë të jemi të vetëdijshëm për nevojën për t’iu shërbyer njerëzve me seriozitet dhe përkushtim. Jam njohur sot në disa bashki ku kanë qeverisur përfaqësues të opozitës, PD e LSI, me kontrata të paligjshme të lidhura dhe në orët e fundit të largimit, që janë të dëmshme. Është detyrë e kryetarëve të rinj që t’i bëjnë publike”, tha Balla.
Ndër të tjera, ka dhënë dhe një koment për vendimin e fundit të presidentit Ilir Meta, për të cilin tha se tashmë është i parashikueshëm dhe shihet qartë se presidenti është pozicionuar kundër qeverisë “Rama”.
