Kreu i grupit parlamentar të PS, Taulant Balla, iu është përgjigjur akuzave të PD, në lidhje me bandat kriminale të Elbasanit dhe të Lushnjes.
Në emisionin “Top Show”, ai tha se e sfidon Bashën të shkojë në Prokurori, dhe të depozitojë akuzat e tij. Nëse ndodh e kundërta, atëherë ai dëshmon se po gënjen. Ndër të tjera ai nënvizoi se për asnjë arsye, nuk do të ketë lidhje me bandat e krimin.
“Të kesh lidhje me bandat është vepër penale, të jesh në dijeni për një krim dhe të mos e denoncosh, është po aq vepër penale. Basha nëse është në dijeni dhe ka prova për këtë dhe nuk e denoncon, atëherë është duke bërë një vepër penale.
Unë sfidoj të shkoj në Prokurori dhe të bëj kallëzim penal për mua, për Ditmirin për këdo. Nëse nuk e bën kallëzimin, atëherë tregon se po gënjen.
Unë kam hyrë në politik i bindur që kurrë nuk do të kemi lidhje me bandat dhe krimin. Dallimi me Bashën, unë kurrë nuk kam qenë nën hetim nga Prokuroria, nuk jam shmangur drejtësisë se jam sëmurë. Unë jam i pastër dhe i qetë dhe pres nëse ka prova për këtë”, tha Balla.
