Kreu i Grupit Parlamentar të Partisë Socialiste, Taulant Balla ka deklaruar këtë mbrëmje se presidenti Meta shkeli Kushtetutën me vendimin për anulimin e zgjedhjeve.
Sipas Ballës, shtyrja e datës së zgjedhjeve është një dëshirë e kreut të shtetit, pasi nuk ka fuqi ligjore.
“Meta kishte nga 4-5 javë që vinte vërdallë lokaleve të Tiranës dhe thoshte do të bëj këtë dekretin. Madje e kishte thënë edhe publikisht që po shqyrtonte mundësinë për këtë. Ky zotëria nuk ka të drejtë ta bëjë, mund ti hyjë vetja në qejf dhe një ditë të shpallet mbret, apo do të thotë të anulohen zgjedhjet në Puglia! Ky zotëria ka të drejtë vetëm të dekretojë datën e zgjedhjeve dhe kaq. Nesër Presidenti mund të nxjerrë një dekret për ç’emërimin e ministrave. Ajo që ka bërë Presidenti sot, është ka shprehur një dëshirë, por kjo mbetet në nivelin e dëshirës” tha Balla.
Kujtojmë se Kryesia e Partisë Socialiste vendosi ditën e sotme të shkarkojë Presidentin e Republikës.
“Kemi njoftuar dhe procesi do të marrë kohën e përcaktuar nga Kushtetuta dhe ajo që kemi institucionalizuar, nevojën që Kuvendi, institucioni më i lartë prej të cilit zgjidhen të gjitha autoritetet e tjera, nga Presidenti dhe cdo tjetër. Për fat të mirë ia kemi hequr Kuvendit, zgjedhjen e gjyqtarëve. Por nuk ka sot në Shqipëri një jurist me mend në kokë që të japë të drejtë Presidentit Meta për atë akt që ka bërë, pasi nuk mund të quhet dekret, pasi nëse do të quhej i tillë do të quhej ç’dekret”, u shpreh ndër të tjera Balla.
