Kreu i Grupit Parlamentar të PS-së Taulant Balla ditën e sotme ka zhvilluar një takim në Gjermani me kryetarin e Grupit Parlamentar SPD, Rolf Mützenich.
Ndërkohë Balla së fundmi ka publikuar në rrjetin social Facebook foto të shkrepura gjatë takimit në fjalë.
“Padyshim që deputetët socialdemokratë në Bundestag do të votojnë unanimisht PRO fillimit të bisedimeve për anëtarësim të Shqipërisë në Bashkimin Europian. Me Kryetarin e sapozgjedhur të Grupit Parlamentar Rolf Mützenich diskutuam mbi vendimin e Bundestagut që autorizon Qeverinë Federale të miratojë vendimin e Këshillit Europian për çeljen e negociatave për anëtarësimin e Shqipërisë në BE. Gjatë takimit rishpreha gatishmërinë të përforcojmë dhe intensifikojmë përpjekjet, në mënyrë që të avancojmë me agjendën e reformave që lidhen me BE-në si dhe të arrijmë rezultate të mëtejshme, të prekshme dhe te qëndrueshme. Mbetemi të përkushtuar të punojmë ngushtësisht me Gjermaninë, në mënyrë që të thellojmë progresin e mëtejshëm në Reformën në Drejtësi, luftën kundër korrupsionit, krimit të organizuar, etj”, shkruan Balla.
