Kreu i grupit parlamentar të Partisë Socialiste, Taulant Balla ka komentuar deklaratën e Metës, lidhur me krizën politike në vend.
“Shumë thjesht mund t’ju sqaroj se jemi në kushtet e një krize politike kushtetuese dhe institucionale, e cila mund dhe duhet të ishte shmangur”, tha ndër të tjera presidenti Meta, gjë për të cilën Balla duket se nuk është dakord.
I ftuar në rubrikën “Opinion” të News 24, Balla tha se nuk e di ç’kishte ndërmend presidenti lidhur me krizën kushtetuese, madje shtoi se ngurron që ta quajë “krizë politike” atë që po ndodh në vend, pasi sipas tij kriza është brenda opozitës.
“Ngurroj që është krizë, presidenti shkoi shumë larg me krizën kushtetuese. Nuk e di çfarë kishte ndërmend presidenti. Kriza është brenda opozitës, e kam thënë që kjo është tradhti e rëndë me qytetarët e këtij vendi. Kam pasur besim që në asnjë rast nuk do të shkohej deri këtu. Opozita ndërmori një vendim të gabuar. PD duhet të heqë dorë nga dhuna ndaj institucionit. Nuk do doja të shikoja përsëri PD dhe LSI që urdhërojnë elementë huliganë të ushtrojnë dhunë.
Apeli im është që PD të mos vijojë ta thellojë zullumin”, tha ndër të tjera Balla./ Tirana Today
