Që në nisje të seancës, kreu i grupit parlamentar të PS, Taulant Balla, i propozoi sot Kuvendit që të mbajë një minutë heshtje për ish-senatorin republikan, Bob Dole. Duke qenë se parlamenti është thuajse bosh, kryeparlamentarja vendosi që nderimi i senatorit të bëhet “kur salla të ketë prezencë më të lartë të deputetëve”. Balla evidentoi rolin dhe mbështetjen e tij për pavarësinë e Kosovës, dhe njohjen e saj nga SHBA dhe shtetet e tjera.
Dole u angazhua herët në politikën amerikane për Kosovën, dhe luajti rol të rëndësishëm në procesin që çoi në krijimin e shtetit të pavarur. Për nder të tij, në Prishtinë është ngritur busti i tij.
Ish senatori republikan, Bob Dole, një hero i Luftës së Dytë Botërore, ndërroi jetë në moshën 98 vjeçare. Gjatë karrierës së tij 36-vjeçare në Capitol Hill, ish senatori republikan, Bob Dole u bë një nga ligjvënësit dhe udhëheqësit më me ndikim në Senat.
