Partia Demokratike dhe ajo Socialiste janë përfshirë në një garë të ethshme akuzash. Duket se skema përsëritet. Kreu i grupit parlamentar të PS, Taulant Balla, ka depozituar në Prokurori kallëzimin penal për kreun e PD, Lulzim Basha, pasi e akuzon për “shpërdorim detyre” dhe “kallëzim të rremë”.
Balla ka kallëzuar penalisht Lulzim Bashën, Basir Çollakun dhe Emiljano Nuhun për “kallëzim të rremë” dhe “fyerje”.
Taulant Balla reagoi të mërkurën menjëherë pas denoncimit të bërë nga oficeri i policisë, Emiljano Nuhu, i cili ngriti akuza edhe ndaj tij, se ka ndikuar në mbylljen e hetimeve për djalin e deputetit socialist, Rrahman Rrahja, i cili akuzohej nga një vajzë për përdhunim.
Balla i vlerësoi akuzat si një sajesë të ndyrë, e cila sipas tij është lehtësisht e verifikueshme.
