Kryetari i grupit parlamentar për PS-në, Taulant Balla komentoi deklaratat ofenduese mes politikanëve në Kuvend në seancën plenare të para dy javëve.
I ftuar në emisionin “Kjo Javë” në News 24, Balla tha se ka mbetur i habitur nga gjuha e përdorur nga kreu i grupit parlamentar të LSI-së, Petrit Vasili, e cila në perceptimin e Ballës kishte arritur “kulmin e kulmeve në Parlament”.
Balla nënvizoi faktin se gjuha e përdorur nga Rama nuk kishte në përbërjen e saj asnjë fjalë të palejueshme dhe ofendues, por këtë shtoi ai e plotësoi opozita.
“Unë kam bërë thirrje në dy seancat dhe ne jemi munduar që duke bashkëlidhur kodin e etikës me rregulloren në disa raste të përdorim dënimin maksimal. Jam habitur nga gjuha e Vasilit, që do ta quaja që arriti kulmin e kulmeve në parlament,. Më ka ardhur keq, Berisha është një repetent i përhershëm sa herë që vazhdon të jetë në karrigen e deputetit. Merreni fjalën e zotit Rama dhe ritransmetojeni dhe gjeni një fjalë që do bëjë pjesë në fjalët e palejueshme. Ju merrni fjalën e Berishës dhe Bashës dhe zonjën kryemadhi që iu drejtohet vajzave dhe grave ministre me një gjuhë tërësisht të papranueshme. Unë e kuptoj se ata kanë nevojë të krijojnë një debat artificial, por ka metodë tjetër për ta arritur këtë”, tha ai.
Përballë gazetares Nisida Tufa, kreu i grupit parlamentar të PS-së hodhi kritika të forta ndaj opozitës dhe për Ballën ajo ka një problem të madh që është mungesa e vizionit dhe lidershipit.
“Ne kemi sot një PD në Kuvend pa program dhe pa lidership. Ai kujton se duke qene kreu i opozitës mendon se merr fjalën sa herë që të dojë, por këtë nuk e ka. Aq sa minuta që flet kryeministri do të flasë edhe një përfaqësuesi i opozitës. Ne jemi duke ndryshuar rregulloren në Kuvend. Debati zhvillohet për program”, shtoi ai.
