Kryetari i Grupit Parlamentar të Partisë Socialiste, Taulant Balla ka reaguar pas dorëheqjes së liderit të djathtë të FPO, Heinz-Christian Strache në Austri, i cili doli në një video-skandal publikuar në media, teksa ai shfaqej tek i ofronte kontrata shtetërore një oligarkeje të dyshuar ruse, në shkëmbim të mbështetjes për fushatën zgjedhore.
Përmes një postimi në “Twitter”, Balla deklaron se në Shqipëri kreu i PD, Lulzim Basha përfitoi më shumë se 1 milion dollarë nga një kompani ‘guackë’ nën pronësi ruse, duke tentuar të rrisë mbështetjen e partisë së tij të djathtë në Washington dhe nuk mban asnjë përgjegjësi.
Po ashtu, Balla shton se Basha për aferën e lobimit rus është nën hetim në SHBA, Britaninë e Madhe dhe në Shqipëri.
“Në Austri lideri i Partisë së Djathtë FPO Strache dha dorëheqjen pas regjistrimit video me një mbështetëse ruse në shkëmbim të mbështetjes politike. Në Shqipëri lideri i PD Lulzim Basha përfitoi më shumë se 1 milionë dollarë nga një kompani guackë nën pronësi ruse, duke tentuar të rrisë mbështetjen e partisë së tij të djathtë në Washington. Basha është nën hetim në SHBA, Britaninë e Madhe dhe në Shqipëri” shkruan ai.
