Një ditë më parë në aktivitetin për Task Forcën kundër krimit, ambasadori amerikan Donald Lu bëri për ujë të ftohtë kryeministrin Rama, duke i kërkuar se përse nuk është arrestuar ende baroni i drogës Klement Balilit.
Lu e cilësoi si një dështim edhe të policisë bashkë me prokurorinë shqiptare. Ndërsa Rama u mbrojt duke thënë se Balili ishte drejtor i LSI-së dhe nuk kapej dot. Edhe pse ai është ende në kërkim.
Ndërkaq sot ish-kryeministri Sali Berisha thotë se lidhjet e Balilit në politikë shkojnë përtej LSI-së. Sipas tij, para se të shpallej në kërkim, Balili u koordinua me zyrën e shtypit në kryeministri për të dhënë intervista në televizione dhe pasi u arratis, është rrëfyer në Greqi.
“Të gjithë e dinë se pesë vite më parë vetë Rama i kishte dhënë urdhër Tahirit, superministrit të tij të mos e prekë njeri Eskobarin, madjë asokohe me Fugën e tij, edhe pas lëshimit nga Greqia të mandat arrestit ndërkombëtar, i rregullonte intervista në media ku Balili me tekste të përgatitura mbrohej duke sulmuar Sali Berishën. Pas largimit të Tahirit, i cili i bashkërendoi trafiqet e Balilit me Habilajt, Xhafa lidhi Geronin me Balilin dhe ky i fundit tashmë shëtiste lirshëm nga Tirana në Delvinë dhe shkonte e rrinte nga një javë si pentito në Greqi ku dhe ka depozituar dosjen e Ramës me regjistrimet përkatëse,” shkruan Bërisha.
Ish-kryeministri i quan krejtësisht mashtrime reagimin e Ramës dhe Xhafajt përballë ambasadorëve lidhur me Balilin.
“Xhafa, pasi oratorët e huaj njëri pas tjetrit aluduan se shkaku i dështimit spektakolar të Task Forcës ishin lidhjet e tij direkte me krimin, zgjodhi të mbrohej duke akuzuar dhe fajësuar opozitën si për ndërrimin e emrit të Agronit në Geron ashtu dhe për “vetëvrasjen” e shoferit të tij më 7 plumba dhe me armën e kapterit të vetë Xhafës, çka ka bërë që të gajasen me të edhe mushkat e gardës dhe ta tregojnë me gisht si porositës të “vetëvrasjes” me 7 të shtëna, madje jo vetëm mbarë garda por edhe Tirana, Shqipëria dhe bota”, përfundon Berisha.
