Ryan Giggs ka marrë postin e trajnerit të Uellsit dhe do ta drejtojë atë në 4-vitet e ardhshme në kompeticione mjaft të rëndësishme. Për ish-anësorin e Manchester United sfida e parë do të jetë Liga e Kombeve dhe më pas eliminatoret për në Euro 2020.
44-vjeçari Giggs ka marrë vendin e Chris Coleman, që u largua në muajin nëntor për të marrë drejtimin e Sunderlandit. Coleman nuk arriti që ta dërgonte ekipin në Botërorin Rusi 2018 dhe për këtë arsye erdhi edhe shkarkimi i tij. Ndihmësi i Coleman, Osian Roberts, ish-sulmuesi uellasian Craig Bellamy dhe Mark Boëen ishin kandidatët e tjerë për të marrë drejtimin e kombëtares uellsiane.
Giggs ka qenë objektiv prej një kohe të gjatë i Federatës uellsiane të Futbollit (FAW) dhe ishte pretendenti kryesor për postin pas largimit të Colemanit, pasi Uellsi dështoi të kualifikohej në Botërorin e këtij viti në Rusi.
Federata uellsiane e konfirmoi emërimin përmes rrjeteve sociale, ndërsa Giggs, përmes një deklarate tha se “Ishte shumë krenar që iu dha mundësia të drejtonte ekipin kombëtar të Uellsit”.
“Sfidat që kemi përpara në Ligën e Kombeve dhe kualifikueset për Euro 2020 më ngacmojnë jashtë mase dhe përbëjnë realisht një bast të vështirë. Mezi pres të filloj punën me lojtarët, për t’u përgatitur për ndeshjet që do të zhvillojmë më vonë gjatë këtij viti”, tha Giggs.
