Ish-deputeti i PD, Ervin Salianji është paraqitur në Gjykatën e Tiranës, për të dëshmuar për çështjen “Babalja”. Përmes një audio-përgjimi të publikuar, dhe që më tej u kthye edhe në akuzën e opozitës ndaj qeverisë, u pretendua se Agron Xhafaj, vëllai i ish-ministrit të Brendshëm, Fatmir Xhafaj, fliste me Albert Veliun, njohur si “Babale” për pazare droge.
“Për Geron Xhafën, mora një denoncim të ri nga gazetari Jetmir Olldashi. Ai më tha se ishte duke bërë një investigim të madh, që kishte lidhje me qeverinë. Meqë unë jam marrë me denoncimin e bandave, ma solli mua. Materialin audio e kam marrë disa muaj para publikimit, ishte në CD, ose USB.
Në këtë material ishte vëllai i ish-ministrit me Albert Veliun. Edhe tabulatet telefonike e vërtetojnë që unë kam folur me Jetmir Olldashin, e më pas me Albert Veliun. Pas publikimit të materialit, kam patur kontakte me të dhe familjarët, pasi Veliu më ka thënë se ishte në rrezik për jetën. Sa herë kishte kontakte me persona të ligjit, ai më shprehte shqetësim”, tha në dëshminë e tij ish-deputeti demokrat.
Në seancën e sotme ka pasur debate të ashpra mes ish-deputetit Ervin Salianji dhe avokatit të Geron Xhafajt, Ardian Visha. Për shkak të përplasjeve në sallë, seanca është ndërprerë për disa minuta.
DEBATI:
Ardian Visha e ka pyetur Salianjin: Jeni ndonjë biçim prokurori i PD që merreni me denoncimet? Çfarë strukture është kjo?
Salianji: Unë nuk përgjigjem me fjalën biçim, duhet ta tërheq.
Autoritetet belge kanë refuzuar kërkesën për azil të depozituar nga Albert Veliu, ose i njohur ndryshe si “Babalja”, që përdori Partia Demokratike për të ndërtuar një audio-përgjim, me qëllim goditjen politikisht të ish ministrit të Brendshëm, Fatmir Xhafaj.
Mësohet se së shpejti i ashtëquajturi “Dëshmitari X” do të ekstradohet për t’u përballur me drejtësinë shqiptare.
Lajmi është bërë i ditur nga prokurori i çështjes, i cili kërkoi nga gjykata të merrte informacion në rrugë zyrtare për këto procedura, duke bërë që procesi të shtyhet për në një datë tjetër.
Ish ligjvënësi Ervin Salianji, Jetmir Olldashi dhe Fredi Alizoti, po përballen me Gjykatën e Tiranës, me akuzën për kallëzim të rremë lidhur me publikimin e një bisede audio ku pretendohej se fliste vëllai i ish-ministrit me Albert Veliun. Alizoti akuzohet se imitoi zërin e Agron Xhafajt ne materialin audio që u publikua nga Partia Demokratike.
