Edhe gazetari Ylli Rakipi ka dëshmuar sot në Prokurorinë e Tiranës, për çështjen “Babale”. Rakipi ka theksuar se nuk njeh as Fredi Alizotin, as Albert Veliun, dhe se ka qenë në dijeni të materialit, por atij nuk i duhej në audio.
“E kam ditur që Olldashi ka pasur një material video për Geron Xhafën. I kam dhënë para Olldashit për investigimin, por nuk ia doli të më sillte materialin që unë kam kërkuar.
Në këto kushte nuk më është dashur një material audio, që më pas u publikua nga PD, por vetëm video. Unë nuk e kam njohur as Fredi Alizotin, as Albert Veliun.
Pas këtij materiali audio, Olldashi më ka kërkuar për të shkuar sërish në Vlorë, nuk kam pranuar, pasi nuk kemi pasur para të mjaftueshme në dispozicion si emision. Më vonë Olldashi është larguar nga emisioni im për punët e veta, dhe nuk kemi bashkëpunuar”, është shprehur Rakipi.
Lidhur me të njëjtën çështje kanë dëshmuar sot dhe prokurori Besim Hajdarmataj si dhe Gazmend Bardhi, në cilësinë e sekretarit të përgjithshëm të Partisë Demokratike.
Pranverën e 2018-ës, PD botoi 2 audioregjistrime, përmes së cilave supozonte se vëllai i ministrit të Brendshëm aso kohe, Fatmir Xhafaj, Agroni ishte i përfshirë në trafikimin e lëndëve narkotike. E tërë çështja u emërua “Babalja”, pasi dëshmitari X i Partisë Demokratike, i cili ishte i përfshirë në audioregjistrime, thirrej në to me pseudonimin Babale.
Krimet e Rënda lëshuan urdhër-arreste për protagonistët e audiopërgjimit, Albert Veliu, i njohur ndryshe me nofkën “Babalja” dhe kunatin e tij, Fredi Alizoti. Nga ekspertiza që i është bërë kampionit të zërit, ai që dëgjohet në audio nuk është i Agron Xhafajt, por i Alizotit, i cili pranonte se kishte imituar zërin e vëllait të ministrit, pasi iu ishin premtuar 200 mijë euro nga deputeti me mbiemrin Salianji.
