Lideri demokrat Lulzim Basha ka zhvilluar ditën e sotme një takim me kryeministrin kroat Andrej Plenkovic, teksa ishte i pranishëm në Kongresin e Partisë Popullore Europiane në Zagreb.
“Kënaqësi të takoja sot mikpritësin e Kongresit të EPP në Zagreb, kryeministrin e Kroacisë Andrej Plenkovic. Presidenca e BE nga Kroacia në Janar 2020 është një lajm shumë i mirë për Shqipërinë dhe gjithë rajonin.
Për Shqipërinë nuk ka dhe nuk mund të ketë alternativë tjetër veç integrimit në BE dhe për këtë, Partia Demokratike dhe unë jemi të vendosur të ndërmarrim çdo vendim dhe hap të nevojshëm”, tha Basha.
Ata diskutuan për kapërcimin e krizës politike që ka mbërthyer vendin. Sipas kryedemokratit, situata kaotike konsiderohet nga vendet anëtare të BE-së si pengesë serioze për nisjen e bisedimeve të anëtarësimit të Shqipërisë.
“Ramë dakord të koordinojmë veprimet dhe vendimet tona për të realizuar të gjitha detyrat e shtëpisë dhe për të mundësuar hapjen sa më parë të negociatave. Kryeministri Plenkovic më garantoi se Kroacia do të vijojë të jetë avokate e fuqishme e Shqipërisë në procesin e anëtarësimit në BE”, shkruan me të tjerash Basha në “Facebook”.
