Këshilli i Imuniteteve është rimbledhur për të shqyrtuar mbi heqjen ose jo të imunitetit të deputetit Saimir Tahiri i akuzuar për përfshirjen në trafikun e drogës. Në fillimin e seancës, avokati mbrojtës i deputetit Tahiri kërkoi që procedimi të shtyhet për tre ditë, dhe të nisë më pas ditën e hënë. Sipas avokatit mbrojtës, kjo bëhet për t’i dhënë mundësi palës së akuzuar për t’u përgatitur deri ditën e hënë. “Është me rëndësi që të kërkojmë që për shkak të pamundësisë reale që ne si mbrojtje kemi pasur për t’u përgatitur sa më cilësore, të kërkojmë kohën e arsyeshme. Pasi prokuroria ngritur edhe pretendime shtesë dhe duhet t’i integrojmë në një mbrojtje në funksion të procesit të rregullt. Duam një afat të arsyeshëm për mbrojtje për një afat prej 3 ditësh, deri ditën e hënë”, u shpreh avokati.
Ndërkaq nga ana e tij, anëtari i PD-së në Këshillin e Imuniteteve, Enkeled Alibeaj tha se kjo kërkesë është për të fituar kohë për të prishur provat. “Nëse keni ndërmend të shtyni deri në kalendat greke, kjo nuk ju bën nder ndërsa kërkoni të thuhet e vërteta. Ose ju keni shkelur procedurën ose po abuzoni me procedurën. Sot po vendosim për t’i dhënë udhë asaj që kërkon prokuroria. Ky është momenti edhe për të treguar realizimin e reformës në drejtësi dhe për të treguar se si funksionon pandëshkueshmëria. Për mendimin tim ne duhet të vazhdojmë me procedimin. Boll iu kemi dhënë shkelësve të ligjit që të prishin provat”, u shpreh Alibeaj.
Ndërsa deputeti socialist Bledi Çuçi, vuri në dukje se mosdakordësia e PD-së me kërkesën e avokatit mbrojtës është një turp dhe tregon gjithë farsën e prokurorisë. “Nuk do ta zgjasja këtë farsë të ardhur nga prokuroria. Por këtu jemi për të respektuar të gjitha procedurat dhe të drejtat. Prokuroria ka ardhur për të ardhur për ta arrestuar dhe deputetit nuk i jepet e drejta për t’u mbrojtur kjo është turp. Ligji dhe rregullorja ka afatet procedurale. Jemi brenda çdo afati procedural. Këtu kemi të bëjmë me një farsë”, theksoi Çuçi.
