Avokati Esmerald Xhafa ka depozituar një kallëzim në Prokurorinë e Korçës ndaj vëllezërve Veshaj. Ai kërkon që dy vëllezërit Donald dhe Romeo Veshaj të hetohen për dëme që mund t’u kenë shkaktuar ikonave në Muzeun e Artit Mesjetar në Korçë, ku dhe kanë xhiruar klipin “Picasso”. Në një deklaratë për mediat, avokati shprehet se ikona të tilla dëmtohen nga blici i kamerës, dhe kurrsesi nuk mund të lejohen klipe në këtë Muze.
Esmerald Xhafa ka paditur Ministrinë e Kulturës, drejtorin e Muzeut Kombëtar të Artit Mesjetar dhe drejtorin e Muzeut të Fotografisë “Gjon Mili” për shkak të klipit “Picasso” që ato kanë regjistruar në ambientet e Muzeut, sipas së cilit nga blici i fortë i kamera afresket mund të jenë dëmtuar.
“Kam bërë kallëzim në lidhje me Ministrinë e Kulturës, drejtorin e Muzeut dhe Drejtorinë e Fotografisë në lidhje me xhirimet që janë kryer për realizimin e këtij klipi. Të gjithë jemi koshient për rregullat në një Muze, sidomos ai i Muzeut Mesjetar të Artit Mesjetar, ku afresket dhe ikonat kanë një rëndësi të veçantë dhe nuk duhet të përdoret blici gjatë filmimeve dhe fotografive. Këto Muzetë janë me kamera. Prokuroria t’i marrë këto pamje, ndërsa sa i përket ato që e realizojnë këtë vepër penale, nëse do ketë vepër penale për realizuesit e klipit, duhet të ketë një akt ekspektimi për këtyre veprave. Kallëzimi konsiston për sa i përket “shpërdorimit të detyrës” nga Muzeu, pasi ligjit për trashëgimitë në brendësi të tij parashikon dhe masa edhe kur është marrë leja nga Ministria e Kulturës, edhe nëse është marrë nuk mund të përdoreshin ato pamje dhe blici duke filmuar ato ikona që dihet sa të vjetra dhe delikate janë”, tha ai.
Ai thotë se kjo është një iniciativë e tij personale, që do i shkojë deri në fund. “Është iniciativë e imja personale, kur pashë pamjet që janë përdorur. Artin e duan të gjithë, por duke bërë atë art nuk mund të përdhosin këtë art. Nuk kam parë klip në Muze të kësaj kategorie, ndoshta ne jemi një vend që plotëson dëshirat e VIP-ve. Duke qenë një iniciativë e imja personale, do e ndjek deri tani”, tha avokati.
Marrë shkas nga ky kallëzim, Drejtoresha e Muzeut të Artit Mesjetar, Fjoralba Prifti, ka deklaruar se këngëtarët kanë marrë leje dhe se gjatë regjistrimit nuk është bërë asnjë padrejtësi kundrejt rregullave të etikës.
“Grupi i këngëtarëve ka aplikuar në Ministrinë e Kulturës, është aprovuar që grupi të kryejë xhirime. Të gjitha janë brenda kushteve të lejuara të Muzeut. Muzeu është një institucion shtetëror laik, dhe nuk është bërë asnjë padrejtësi kundrejt rregullave të etikës”, tha Prifti.
