Hashim Thaçi, ka dalë para Dhomave të Specializuara të Gjykatës së Hagës. Avokati mbrojtës i ish-presidentit Hashim Thaçi, tha se kjo seancë është bërë pa njoftuar në kohë mbrojtjen. Ish-presidenti Thaçi po mbrohet nga një grup ndërkombëtar avokatësh, nga Uellsi, SHBA dhe Franca. Në seancën e sotme, David Hooper, anëtar i gjykatës së Uellsit, që mbron Thaçin, kundërshtoi procedurën e ndjekur nga Gjykata e Hagës. Ai tha se ky proces është realizuar pa njoftuar mbrojtjen në kohën e duhur.
“Ky proces është realizuar pa njoftuar mbrojtjen në kohën e duhur, do të bashkëpunoj me Gjykatën, ashtu siç edhe vetë z. Thaçi ka deklaruar gjatë këtyre viteve, me themelimin e këtij institucioni. Këtë akuzë e keni para 6 muajsh, ne mësuam për herë të parë, për mendimin tim ishte të mërkurën në mbrëmje apo të enjten, pra nuk ishte e mundur që të krijonim grup apo të thërrisnim njerëz që të ishin këtu. Nga ana e jonë e kemi të pakuptimtë, ose ta kuptojmë se pse është vepruar në këtë mënyrë”, tha avokati mbrojtës.
