Avokatët e Jaeld Çelës kanë apeluar vendimin e Gjykatës së Krimeve të Rënda për ish-kryepolicin, pas vendimit me 3.4 vite burg. Çela kërkon pafajësinë në Apel, ndërsa në Shkallë të Parë u gjet i fajshëm për “shpërdorim detyre”.
Ish-drejtori i Policisë së Vlorës u dënua për “shpërdorim detyre” nga Krimet e Rënda me 5 vite burg, që ulet në 3.4 vite për shkak të gjykimit të shkurtuar. Ky i fundit akuzohej bashkë me ish-ministrin e Brendshëm, Saimir Tahiri, për favorizim të trafikut të drogës.
Gjykata vendosi që të rrëzonte akuzat për “grup të strukturuar kriminal”, “kryerje të veprave penale në kuadër të grupit kriminal”, dhe “trafik droge” për Çelën duke e dënuar vetëm për “shpërdorim detyre”.
Nga ana tjetër “për shpërdorim detyre” u dënua edhe Tahiri, por ndryshe nga Çela, për ish ministrin dënimi u konvertua në “shërbim prove”.
