Policia ka arrestuar tre persona, të dyshuar si të përfshirë në atentatin e 10 majit të vitit 2019 ndaj Ines Hajrullës në qytetin e Vlorës. Nga të shtënat me armë zjarri në drejtim të lokalit ku qëndronte Hajrulla, mbeti i plagosur një kalimtar i rastësishëm, Dajko Canodemaj, 63 vjeç.
Gjatë operacionit të koduar “Gjurmimi”, dy persona u arrestuan në Itali dhe një tjetër është kapur në Vlorë. Ky i fundit identifikohet me iniciale Xh. M., 36 vjeç, ndërsa akuzohet për veprat penale “Moskallëzim krimi” dhe “Përkrahja e autorit të krimit”. Po ashtu, është shpallur në kërkim F. H.
Deri më tani, numri i të arrestuarve të dyshuar si të përfshirë në këtë atentat ka shkuar në shtatë, ndërkohë vijojnë hetimet për të zbuluar të tjerë persona.
Ines Hajrulla, i njohur ndryshe edhe si ”Ini i Çones” në Vlorë, është djalë i biznesmenit Robert Hajrulla.
Njoftimi i plotë i policisë:
Në vijim të punës intensive për zbardhjen e ngjarjeve kriminale kundër personit, të ndodhura më parë, Seksioni për Hetimin e Krimeve ndaj Personit në DVP Vlorë, në bashkëpunim me Departamentin e Policisë Kriminale Tiranë dhe nën drejtimin e Prokurorisë së Rrethit Vlorë ka bërë dokumentimin e plotë të ngjarjes së ndodhur në maj të vitit 2019, në lagjen “Ujë i Ftohtë”, ku persona të paidentifikuar qëlluan me armë zjarri në drejtim të tre shtetasve në një lokal dhe si pasojë mbeti i plagosur aksidentalisht 63-vjeçari D. C.
Në këtë kuadër gjatë orëve të fundit ka vijuar operacioni policor i koduar “Gjurmimi”, në Vlorë dhe në Itali.
Në Vlorë, nga Seksioni për Hetimin e Krimeve ndaj Personit në DVP Vlorë është bërë e mundur kapja dhe ndalimi i shtetasit Xh. M., 36 vjeç, lindur e banues në Vlorë, për veprat penale “Moskallëzim krimi” dhe “Përkrahja e autorit të krimit” .
Operacioni ka vijuar në Itali, ku si rezultat i shkëmbimit të informacioneve mes Interpol Tirana dhe Interpol Roma, bashkëpunimit të shkëlqyer mes Zyrave Ndërlidhëse të Policisë shqiptare në Bari e Romë në Itali dhe të Policisë italiane në Tiranë, me angazhimin e Skuadra Mobile në Romë është bërë e mundur kapja e dy personave të shpallur në kërkim ndërkombëtar, në afërsi të Romës, me qëllim ekstradimi drejt vendit tonë dhe konkretisht:
M., 31 vjeç dhe G. D. (Z.), 42 vjeç, të dy banues në Vlorë;
Gjithashtu është bërë shpallja në kërkim e shtetasit F. H. dhe vijon puna për kapjen e tij.
Ndaj shtetasve I. M., G. D. dhe F. H., Gjykata e Shkallës së Parë Vlorë ka caktuar masën e sigurisë “Arrest në burg” për veprat penale “Vrasja në rrethana cilësuese” e mbetur në tentativë, e kryer në bashkëpunim dhe “Armëmbajtja pa leje”.
Në lidhje me këtë ngjarje, më datë 14.11.2019 janë arrestuar edhe 4 shtetas, ndërsa 1 tjetër është proceduar në gjendje të lirë.
Materialet iu referuan Prokurorisë, në ngarkim të shtetasve I. M dhe G. D, për veprat penale “Vrasja në rrethana cilësuese”, e mbetur në tentativë, e kryer në bashkëpunim, “Armëmbajtja pa Leje” dhe në ngarkim të shtetasit Xh. M, për veprat penale “Moskallëzim krimi” dhe “Përkrahja e autorit të krimit”.
