Gazetari investigativ, Artan Hoxha, ka paralajmëruar hakmarrje të grupeve kriminale, nëse nuk kapen autorët e vrasjes së 19-vjeçarit Erjon Xhenja.
Në një intervistë për “Abc Live”, Hoxha tha se nëse autorët e vrasjes së 19-vjeçarit nuk kapen, atëherë priten atentate të tjera. I riu u vra me armë zjarri më 18 shtator, në një lokal në Shkodër.
Hoxha u shpreh se Shkodra është kthyer në një nga qytetet më të kanabizuara në Shqipëri, kjo në kombinim me grupet kriminale, ku e bëjnë qytetetin të rrezikshëm.
“Ngjarja e Shkodrës fillon në 25 gusht me atentatin e Alban Bruçit. Për këtë u akuzua Bajram Çekorja dhe djali i një biznesmeni të cilët u shpallën në kërkim. Kjo aktivizoi një konflikt që është gjithë kohës në ajër. Por tentativa për Bruçin dështoi. Baba i Çekores reagoi pak ditë më pas dhe tha se sa herë që ndodhin krime, policia i vjen në shtëpi, duke thënë se policia mbështet grupet kriminale në Shkodër. Ai akuzonte se grupi kundërshtar ka mbështetjen e shtetit. 4 ditë pas 25 gushtit, Bajram Çekorja shpallet në kërkim. Ismet Çekorja tha se i biri s’ka gisht, Në datë 2 shtator vritet në atentat Ismet Çekorja, ai që tha se policia mbështet grupet kriminale. Vrasja e tij i trazoi ujërat. Kjo u shoqërua me atentatin e 18 shtatorit, ku Erjon Xhenje 19 vjeç u vra në një lokal. Grupet kriminale nuk goditen vetëm njerëzit direkt, por dhe të afërmit. Në Shkodër janë të gjithë të kërcënuar. Ngjarja nisi në 25 gusht, nuk u veprua shpejt, prandaj pati atentate të tjera. I pari erdhi më 2 shtator, i treti më 18. Sigurisht do të ndodhi dhe tjetër, sigurisht e di emrin por nuk di se kur. Shkodra ka qenë qyteti më i kanabizuar këtë vit. 200 bimë kanabisi në një parcelë. Zona më e kanabizuar e miksuar me konfliktet e grupeve. Nëse nuk merren masa, do presim vetëm viktimën e radhës”, tha Artan Hoxha.
Ngjarja e rëndë ndodhi rreth orës 20:10, pranë kryqëzimit të Kirasit, në zonën e njohur si “Rruga e Gjerë”. Erjon Xhenja ishte duke pirë kafe, ndërsa u qëllua nga autorët që po lëviznin me motoçikletë. Ata qëlluan me breshëri plumbash, duke e lënë të vdekur në vend.
Atentati mendohet se është kryer nga dy persona që ishin të maskuar dhe lëviznin me motoçikletë. Njëri ka qëlluar nga distancë e afërt me 8 plumba pistolete. 5 plumba prekën trupin e të riut. Rreth 500 metra larg vendit të ngjarjes, në lagjen “Guerile” është gjetur duke u djegur motoçikleta, së bashku me pistoletën që dyshohet se i përket autorëve.
