Ende pa autor është ngjarja e rëndë që ndodhi mbrëmë në qytetin e Rrëshenit. Policia ka shoqëruar dhe marrë në pyetje një numër të madh personash, që mund të kishin ndonjë dijeni mbi këtë vrasje.
Anton Keli, 51 vjeç, u qëllua për vdekje në Rrëshen nga disa persona ende të paidentifikuar.
Sipas burimeve, autori apo autorët e kanë ruajtur Anton Kelin sapo ka zbritur nga automjeti, ku e kanë qëlluar 6 herë me pistoletë. Tre nga plumbat i ka marrë në trup, të cilët i shkaktuan edhe vdekjen.
I ndjeri jetonte jashtë shtetit me bashkëshorten dhe fëmijët, dhe ishte kthyer ne Rrëshen për festat e fundvitit për të festuar me të ëmën.
51-vjeçari u qëllua në afërsi të Katedrales së qytetit të Rrëshenit. Ai ka ecur 40 metra në këmbë për të kërkuar ndihmë në një biznes afër. Ndonëse është transportuar menjëherë në spital, nuk ia ka dalë dot mbanë nga plagët e marra.
51-vjeçarit i është bërë pritë nga autorët. Ai ka ndaluar makinën për t’u futur në një market, atëherë autorët kanë qëlluar në drejtim të tij. Brenda automjetit gjendeshin fëmijët dhe bashkëshortja e Antonit.
Dyshimet e parë të policisë në lidhje me ngjarjen janë ato të hasmërisë.
Anton Keli është kushëri i parë me Tonin dhe Preng Gjinin, dy vëllezërit që kanë hasmëri të hapura me fisin Reçi në qytetin e Rrëshenit. Tonin Gjini mbeti i vdekur nga ky konflikt mesditen e 12 gushtit 2019, dhe dyshimet të lidhin me familjen Reçi.
