Rreth 15 persona janë shoqëruar nga Policia e Vlorës në cilësinë e personave të dyshuar, që mund të ndihmojnë hetuesit për atentatin e një dite më parë. Bëhet fjalë për zbardhjen e vrasjes së Shpati Lenës dhe Hakim Xhezos. Të dy u ekzekutuan nga plumbat e tre kallashnikovëve, që u përqëndruan tek xhamat anësorë nga krahu i shoferit dhe xhami ballor i makinës. Sipas burimeve të policisë, autorët kanë ndjekur lëvizjes e viktimave prej ditësh. Po kështu ka dyshime se autorët janë vrasës me pagesë, të cilët dogjën mjetin pas krimit.
Atentati mafioz ndodhi ditën e djeshme në aksin Vlorë-Fier, ku u ekzekutuan me 60 plumba kallashnikovi Shpati Lena, 37 vjeç dhe Hakim Xhezo, 34 vjeç. Vrasësit kanë shkrepur 30 plumba në drejtim të tre personave në “Benz” dhe pasi parakaluan automjetin ku ndodheshin Lena dhe Xhezo, kanë qëlluar dhe 30 herë të tjera në drejtim të xhamit të përparmë të “Benzit”.
I gjithë aksioni i vrasjes së Shpati Lenës dhe Hakim Xhezos zgjati 2 minuta. Automjeti i viktimave eci dhe 200 m dhe ra në një kanal në anë të autostradës. Më vonë, uniformat blu të Vlorës gjetën makinën e atentatorëve të djegur me 3 kallashnikovë brenda “BMW” në fshatin Çerven. Bindja e grupit hetimor se atentati është kryer nga vrasës profesionistë lidhet me drejtimin e plumbave. Për sa i përket shkaqeve të ngjarjes, policia ka ngritur dy pista: prishja e mundshme e pazareve të drogës dhe kryesorja vrasja e një pronari lokali Arben Beqiraj në Plazhin e Vjetër në 4 gusht 2019, ku u përfshinë vëllai i Hakim Xhezos, Eduarti dhe vetë Shpati Lena. Viktimat njiheshin me nofkat “Bushi” dhe “Shpati”.
