Deputetja e opozitës parlamentare, Rudina Hajdari deklaroi sot gjatë seancës parlamentare se askush nuk mban përgjegjësi për ngjarjet kriminale që kanë tronditur vendin.
Në fjalën e saj, ajo përmendi edhe atentatin tek mbikalimi i Shkozetit ndaj prokurorit të Durrësit Arjan Ndoja, si dhe vrasjen e gjyqtares Fildes Hafizi. Ndërsa kërkon nga kryeministri Edi Rama që të mbajë përgjegjësi një herë të vetme për situatën aktuale.
“Kush e ka fajin sot që një prokuror qëllohet me kallashnikov në mes të rrugës, që një grua gjyqtare u vra në rrugë edhe kur kërkoi të mbrohej nga ligji.
Kush e ka fajin që janë hequr më shumë se gjysma nga sistemi. Kush e ka fajin që askush nuk ka besim tek sistemi i drejtësisë dhe se persona të lidhur me botën e krimit kanë mbështetjen për t’u futur në dyert e bashkive.
Kush e ka fajin që këto rrjete kriminale nuk janë në gjendje të kontrollohen dhe sot nuk e lënë vendin të përparojë. Kush e ka fajin që akoma një ligj zgjedhor që garanton vetëm votën e listës. Zoti kryeministër, dil njëherë dhe mbaj përgjegjësi për një nga këto pika. Sot nuk ke të blesh dhe shesësh më, ke vetëm veten tënde nuk ke asnjë alibi që të mbrojë. Sot je vetëm lakuriq para shqiptarëve pa asnjë shpresë dhe pa shënuar asnjë arritje në 6 vitet e fundit, ke kabinetin më të dobët me performancë të dobët që nuk ka bërë asgjë. Ke një vend të varfër, ku 30 % e popullsisë nuk shtyjnë dot muajin, kurse shtresa më e vyer e shoqërisë që po largohet”, u shpreh Hajdari.
