Ardi Veliu dhe drejtues të lartë të policisë kanë zhvilluar një mbledhje me dyer të mbyllura, ku është folur gjatë për atentatin ndaj prokurorit Arian Ndoja.
Sipas Panoramës, Kreu i Policisë së Shtetit Ardi Veliu ka kërkuar informacione në lidhje me situatën dhe ka dhënë porosi drejtuesve për zbardhjen sa me shpejt të ngjarjes. Mbledhja ka zgjatur rreth 4 orë.
Për ngjarjen këto ditë ka pasur një angazhim maksimal të policisë dhe Prokurorisë të Krimeve të Rënda. Kujtojmë se pak orë pas atentatit, në Durrës zbriti dhe Drejtuesja e komanduar e Krimeve, Donika Prela.
Vrasjet e njerëzve të drejtësisë janë konsideruar gjithmonë si atentate mafioze dhe dosjet kanë përfunduar duke u mbyllur pa autor. Më të vështirat për t’u zbardhur, atentatet ndaj avokatëve, prokurorëve e gjyqtarëve, mbeten edhe më të rëndat në sytë e qytetarëve.
Sipas Panoramës, që nga viti 1999 e deri sot, janë vrarë në atentate tipike mafioze, që vijojnë ende të jenë të pazbardhura, 4 njerëz që kanë pasur lidhje direkt me sistemin e drejtësisë në vend. Një vajzë prokurori, kryetari i Dhomës së Avokatisë, një gjyqtar dhe së fundi një avokat kanë humbur jetën në sulme, për të cilat ende nuk është arrestuar askush. Reagimet në të gjitha rastet kanë qenë të shumta dhe kërkesa për zbardhjen e tyre e lartë, por deri më tani, asnjë atentat ndaj përfaqësuesve të sistemit të drejtësisë në vend nuk është zbardhur.
