Arrestohen autorët e atentati me eksploziv ndaj Lulzim Kullës në Shkodër më 13 janar. Dy persona vendosën një tritoli në lagjen “Rus”. I plagosur nga shpërthimi mbeti objektivi i atentatit Kulla, i njohur si “i forti” i Shkodrës, si dhe tetë persona të tjerë.
Drejtori i Policisë Vendore të Shkodrës, Gjovalin Loka ka publikuar edhe emrat e personave të ndaluar për këtë ngjarje, në një deklaratë për median.
Kujtojmë se ditën e sotme policia e Elbasanit ka ndaluar 7 persona të dyshuar për atentatin ndaj biznesmenit të njohur shkodran.
Në operacionin e policisë “Together” u kapën dhe u arrestuan shtetasit; Endri Çopja 29 vjeç dhe Argel Lulaj 31 vjeç, të dy banues në Elbasan.
Arrestimi i tyre u bë pasi gjatë hetimeve të ndjekura me metoda speciale dyshohet se janë autorë për ngjarjen në fjalë, ku mbetën të plagosur me lëndë plasëse 8 shtetas, ndër ta edhe shtetasi me iniciale L.K., i cili dyshohet se ishte objektiv i atentatit.
Gjithashtu u arrestua në flagrancë shtetasi Serxho Teta, 24 vjeç, banues në Elbasan, për veprën penale “Veprime që pengojnë̈ zbulimin e së vërtetës”, “Mbajtja pa leje dhe prodhimi i armëve, i armëve shpërthyese dhe i municionit”.
Gjatë kontrollit të ushtruar në banesat e tyre janë gjetur dhe sekuestruar në cilësinë e provës materiale disa celulare, 4 automjete, 2 nga të cilat janë përdorur nga autorët ditën e ngjarjes, 6 000 euro, tre maska dhe fishekë luftarake.
