Ish-kreu i PS në Vaun e Dejës që u plagos me armë, u ka thënë policëve se nuk ka konflikte me askënd, dhe se nuk e di kush janë autorët apo përse e kanë plagosur. Nikolin Huba është dërguar për mjekim të specializuar në Tiranë. Ai ka rrëfyer se si ka ndodhur ngjarja, ndërsa dy persona janë autorë të plagosjes me armë zjarri.
Nikolin Huba ka dalë nga ambientet e një lokali, ku i janë afruar dy persona me motor me skafandë në kokë, dhe e kanë qëlluar.
“Sapo kam dalë nga kafja, dy persona me motor me skafandë në kokë janë afruar dhe më kanë qëlluar. Nuk më kanë thënë asnjë fjalë. Une nuk e di se kush janë, sepse nuk kam asnjë konflikt me askënd. Vetëm qëlluan dhe ikën, nuk kam asnjë ide përse më qëlluan”, ka thënë Huba.
Pistat në të cilat po heton policia
Policia e Shkodrës, pistën kryesore ka atë të drogës. Kohët e fundit ka pasur disa aksione në zonën e Vaut të Dejës, ku janë asgjësuar rrënjë kanabisi dhe janë arrestuar disa persona të ndryshëm. Pista kryesore e policisë është se kultivuesit kanë dyshuar se Huba mund të ketë dhënë informacion për efektivët, duke i dhënë një mesazh përmes kësaj plagosje. Gjithsesi, kjo është një pistë fillestare që ka policia, ende e pabazuar në prova, por që është pista kryesore për të cilën dyshohet se ka ardhur kjo plagosje. Policia po heton edhe pista të tjera, për ta zbardhur të plotë ngjarjen.
