Sa i takon ngjarjes së ndodhur mbrëmjen e 21 prillit të këtij viti në Fier, ku një mjet shpërtheu pas vendosjes së një sasie eksplozivi, ekspertët kanë dalë në përfundimin se lënda plasëse është aktivizuar me anë të një thirrje telefonike.
Sasia e eksplozivit shpërtheu në makinën e 38-vjeçarit Ervin Memo, i cili ndodhej brenda në automjet.
Pas ekspertimit të imtësishëm që i është kryer automjetit tip Benz, me targa AA 270 IV, të shkatërruar thuajse krejtësisht si pasojë e shpërthimit, ekspertët kriminalistikë kanë konkluduar se lënda plasëse gjendej në kroskot, nga ana e pasagjerit.
Tashmë uniformat blu po punojnë për verifikimin e numrit celular, prej nga është kryer thirrja që ka aktivizuar eksplozivin.
Po kështu, ekspertët kanë konkluduar që presioni i krijuar nga shpërthimi i eksplozivit, të jetë përqendruar në drejtim të ndenjëses së pasagjerit. Ndërsa 38-vjeçari Ervin Memo gjendej në ndenjësen e drejtuesit të mjetit, ka marë goditje që i sollën vetëm dëmtime në lëkurë, por pa pasoja të rënda për jetën.
Ngjarja
Shpërthimi i fuqishëm ndodhi mbrëmjen e 21 prillit të këtij viti, rreth orës 22:45, në lagjen “29 Nëntori” në qytetin e Fierit, pranë vendit të quajtur kryqëzimi i Grecallisë.
Hetimi në disa pista
38-vjeçari Ervin Memo ka deklaruar në atë kohë para hetuesve se nuk ka asnjë lloj konflikti tjetër, veç konflikteve për pronat. Familja e 38-vjeçarit ka trashëguar toka në qytetin e Fierit, pranë unazës së re, ku është ndërtuar edhe një pallat që është në proces legalizimi.
