Policia e Vlorës ka shoqëruar 7 persona në komisariat pas atentatit të dështuar mbrëmë që iu bë 30-vjeçarit Endrit Sadedini. Tvklan.al mëson se gjatë dëshmisë para hetuesve, Sadedini ka thënë se nuk e ka idenë kush mund ta ketë vendosur eksplozivin dhe nuk dyshon tek askush.
Për policinë, 30-vjeçari nuk njihet si person problematik. Ai është pronar i një lokali në zonën e “Ujit të Ftohtë”. ABC News raporton se në muajin Prill të këtij viti, në lokalin që ai ka në zotërim u vra një person dhe u plagosën tre të tjerë. Në atë kohë, Sadedini u procedua në gjendje të lirë nga policia për moskallëzim krimi dhe që prej atëherë e ka lënë lokalin me qira.
Më 20 Prill, në lokal u ekzekutua me armë 33-vjeçari Ergys Gjioveshaj dhe u plagosën aksidentalisht edhe 3 persona të tjerë, mes të cilëve edhe një femër. Nuk dihet nëse vendosja e tritolit mbrëmë mund të ketë lidhje me ngjarjen e Prillit, megjithatë policia po heton edhe në këtë pistë.
Endrit Sadedini njoftoi dje rreth orës 18:55 policinë për një pako të dyshimtë të vendosur 2 metra përpara makinës së tij tip “Benz”. Forcat xheniere kryen shpërthim të kontrolluar dhe zbulan 500 gram eksploziv brenda pakos së dyshimtë. Grupi hetimor sekuestroi kamerat e sigurisë së një biznesi aty pranë që kanë fiksuar një person të dyshimtë që mund të ketë vendosur lëndën plasëse.
