Briken Sanaj, babai i dy fëmijëve u qëllua për vdekje me dy plumba në fytyrë. Ngjarja e rëndë ndodhi mbrëmjen e djeshme në zonën e “Kodrës së Diellit”, në kryeqytet. 39-vjeçari prej vitesh ka jetuar në Itali, për t’u kthyer vetëm dy vite më parë, ku prej më shumë se një viti jetonte në zonën e “Kodrës së Diellit”.
Pak kohë pas vrasjes së Sanajt, një automjet i djegur është gjetur në zonën e Qafë-Kasharit. Mjeti “Benz” me targa AA777GY, rezulton i vjedhur, çka shton dyshimet për një atentat të organizuar.
Viktima, prej një viti ishte rezident te kompleksit të banesave te “Kodra e Diellit”, por që pavarësisht emrit në dokumenta, rojet private të këtij kompleksi e njihnin me emrin Anton Gjini.
I ndjeri ka pasur edhe një emër tjetër. E njihnin si Skerdi. Aktualisht, policia ka shoqëruar në komisariat dy miqtë e tij që kanë dëshmuar gjithçka, ndërsa janë vënë në kërkim të autorëve.
Një ndër pistat, hakmarrja
Hakmarrja dyshohet të jetë një ndër shkaqet që ka çuar në ekzekutimin e 39-vjeçarit Briken Sanajt një natë më parë në Tiranë. Vëllai i 39-vjeçarit Briken Sanaj ka plagosur vite më parë një person. Ende nuk bëhet me dije se për cilën ngjarje bëhet fjalë, por vëllai i tij ka plagosur një person në vitin 2012 në Ishull Lezhë. Familja e Sanajt, jeton ende në në lagjen “Besëlidhja” të qytetit të Lezhës. Vetë 39-vjeçari Sanaj, apo siç njihej ndryshe Anton Gjini, ishte zhvendosur të jetonte në Tiranë prej një viti. Viktima Briken Sanaj rezulton pa precedent të mëparshëm penal.
