Vlora u trondit dje nga një përplasje me armë zjarri mes grupeve kriminale që veprojnë në këtë qytet. Një atentat u shënua rreth orës 11:00 në qytetin bregdetar, në një zonë mjaft të populluar siç është shëtitorja e Lungomares. Objektivi i këtij atentati i shpëtoi plumbave, ndërsa nga të shtënat mori një plumb në këmbë një qytetar, i cili ishte duke pirë kafe në një lokal në këtë zonë.
Shënjestra e atentatit
Shënjestër e atentatit ishte Inez Hajrulla, një emër i njohur për policinë e Vlorës. Ai u sulmua në zonën e Lungomares, pranë një kompleksi që është në pronësi të Edison Harizajt, i ashtuquajtur “kumbari” ose “faqedjeguri”, i vrarë disa muaj më parë në Durrës.
Përplasje e armatosur mes dy grupeve
E gjithë dinamika u zhvillua në një përplasje të armatosur mes dy grupeve që lëviznin në Lungomare, në dy automjete të ndryshme, njëri prej të cilëve Land Rover, që nga hetimet rezultoi të ishte me targa të vjedhura. Nga të dyja makinat ka pasur shkëmbim zjarri teksa ecnin pranë njëra-tjetrës. Por nga sa rrëfejnë dëshmitarët, në një moment fuoristrada është ndalur dhe nga automjeti tjetër ku dyshohet të ketë qenë Inez Hajrulla, kanë zbritur në këmbë dy persona, së bashku me shënjestrën e atentatit dhe kanë nisur të qëllojnë ndaj kundërshtarëve. Teksa të gjithë shpëtuan pa lëndime, një qytetar krejt i rastësishëm, pa lidhje me ngjarjen, mbeti i plagosur. 58-vjeçari Dajko Cenodemaj, punonjës në Bashkinë e Vlorës, ishte duke pirë kafe me miqtë në lokalin pranë përplasjes së armatosur. Ai mori një plumb në këmbë dhe ndodhet jashtë rrezikut për jetën.
Dëshmia e 58-vjeçarit
“Po pija kafe me tre shokë. Dëgjuam të shtënat përballë nesh. Ne thamë se ishin fishekzjarrë, por më pas pamë që po qëlloheshin nga të dyja krahët. Edhe nga fuoristrada, edhe ata të tjerët, pastaj po vinin edhe në këmbë disa djem. U futëm të gjithë brenda. Kur u futëm brenda pash gjakun që po më rridhte nga këmbët, aty shoh që kisha marrë plumb në këmbë. Më mori një shok me makinë, me solli në spital”, u shpreh Dajko Cenodemaj pasi mori ndihmën e parë mjekësore.
Kush është objektivi i atentatit
Inez Hajrulla, objektivi i atentatit të djeshëm në Vlorë, është një personazh i njohur për policinë dhe drejtësinë. Ky është atentati i dytë që i bëhet atij në harkun kohor të dy viteve. Në nëntor të 2017 mjeti me të cilin ai po udhëtonte u hodh në erë, e për pasojë Hajrulla mbeti i plagosur rëndë duke humbur një nga këmbët. Por pas ekzaminimit të makinës së shpërthyer me 300 gr tritol, policia arriti të gjejë edhe një pistoletë të markës “Glock”, me 17 fishekë.
Arma ishte futur në një çantë e cila mbahej nga Hajrulla. Ndaj tij u ngrit akuza e armëmbajtjes pa leje. Hetimet për atentatin në atë kohë u përqendruan në mundësinë e përfshirjes së tij në aktivitete të paligjshme. Burimet thanë se shkak për atentatin mund të jetë bërë një mosmarrëveshje me një grup tjetër pas humbjes së një ngarkese me hashash në Itali. Hetuesit po përpiqen të shkëmbejnë informacione me shërbimet policore të vendeve partnere, kryesisht në Itali. Në këtë vend po hetohet nëse Hajrulla apo të afërm të tij, mund të kenë qenë të përfshirë në aktivitete kriminale.
