Pre e grabitjes ka rënë banesa e mjekut gjinekolog të Librazhdit, Kujtim Albrahimi. Tre persona të maskuar dhe të armatosur me armë të ftohta kanë hyrë në banesën e mjekut gjinekolog, e cila ndodhet në lagjen nr.1 të Librazhdit. Nën kërcënimin e thikës, grabitësit pasi kanë hyrë në banesë, kanë arritur të marrin rreth 12 milion lekë të vjetra si dhe sendet me vlerë që ndodheshin në banesë.
Autorët kanë goditur disa herë me grushta mjekun gjinekolog, ndërsa bashkëshorten e tij e kanë shtyrë. Mësohet se mjeku Albrahimi ka pësuar disa dëmtime të lehta dhe nxirje të syrit. Kujtim Albrahimi ka qenë më parë edhe drejtor i spitalit të Librazhdit. Në lidhje me ngjarjen, policia e Librazhdit ka dhënë shumë pak detaje, duke u mjaftuar vetëm me një deklaratë të shkurtër për mediat, por pa bërë publike shumën e grabitur në banesën e mjekut gjinekolog.
Duke iu referuar grupit hetimor, personat që grabitën banesën e mjekut gjinekolog Kujtim Albrahimi kanë qenë profesionistë. Burime nga grupi hetimor thonë se në banesën e mjekut Albrahimi kishte alarm si dhe 8 kamera sigurie.
Autorët e grabitjes, përpara se të hynin në banesë ku jetonin burrë e grua, kanë shkëputur alarmin si dhe kanë hequr kamerat e sigurisë, ku i kanë marrë serverin e tyre. Pas grabitjes, policia ka shoqëruar në komisariat të gjithë personat me precedent penal. Përpara policisë, mjeku gjinekolog ka treguar se grabitësit ishin të maskuar, ç’ka nuk ka arritur që të identifikojë fytyrat, ndërsa ka thënë se nga lëvizjet, ata ishin profesionistë.
