Pas shtatë fitoresh rresht Interi është turpëruar me rezultatin e thellë 4-1 nga Atalanta. Protagonist në këtë sfidë ka qenë edhe shqiptari, Berat Djimsiti, i cili ka shënuar golin e parë në Serie A. Ai ka arritur të limitojë Icardi-n dhe ka shënuar golin e tretë të vendasve.
Goli që ka zhbllokuar takimin ka ardhur në minutën e 9-të dhe është realizuar nga Hateboer, i cili ka dërguar topin në rrjetë duke përfituar nga një pozicionim i gabuar i mbrojtjes mike. Po të mos kishte qenë për pritjet spektakolare të Handanovic dhe gabimeve të vendasve, Inter do ta kishte mbyllur pjesën e parë me një disavantazh më të thellë.
Gjithsesi, miqtë kanë reaguar menjëherë në pjesën e dytë duke shënuar golin e barazimit me Mauro Icardi-n, i cili ka arritur të mundë Berishën nga pika e bardhë e penalltisë, të fituar pas një prekje të topit me dorë të mbrojtësit Mancini. Ky i fundit e ka shlyer gabimin e tij në të 62-ën, duke mposhtur Handanovic me një goditje të fortë me kokë.
“Isha 16 vjeç dhe luaja te të rinjtë e Fiorentina-s, por bëra një tatuazh të numrit 23 në nder të Marco Materazzi-t. Ai ka qenë idhulli im në futboll”. Kjo ka qenë deklarata e bërë nga Gianluca Mancini, mbrojtësit 22-vjeçar të Atalanta-s për “Gazzetta dello Sport”, një ditë para ndeshjes me Inter-in.
Atalanta ka siguruar fitoren dy minuta para fundit me golin e realizuar nga mbrojtësi shqiptar Berat Djimsiti, i cili, ashtu si Mancini, ka mposhtur numrin një të zikaltërve me një goditje me kokë. Miqtë kanë mbetur me 10 lojtarë në minutën e 92-të pas kartonit të kuq të marrë nga Brozovic, ndërsa në të 94-ën ka ardhur edhe goli i katërt i vendasve, i realizuar nga Gomez.
Falë këtyre tri pikëve, bergamaskët janë ngjitur përkohësisht në vendin e gjashtë të renditjes. Inter, nga ana tjetër, mbetet në vendin e tretë me 25 pikë.
