Kryetari i Bindjes Demokratike, Astrit Patozi, ka komentuar krizën politike në vend, teksa shprehet se e vetmja zgjidhje mbeten zgjedhjet e parakohshme.
I ftuar në ABC News, Patozi tha se nuk do t’i thoshte jo një ftesë për bashkëpunim me Lulzim Bashën, nëse si pikësynim final do të ishin zgjedhjet e parakohshme.
Patozi vijon më tej duke deklaruar se ata kanë të njëjtin objektiv dhe do të shikojnë të gjitha format bashkëpunimit.
“Unë nuk përjashtoj dhe nuk paragjykoj askënd, sidomos një formacion i cili është opozitar po ashtu si Bindja Demokratike. Unë shpresoj, nuk dua të flas për një gjë që nuk ka ndodhur, për një gjë që është ende në kuadrin e një thashethemi, por ajo që ka rëndësi është që ne të konvergojmë, do doja që çdo formacion opozitar të jepte kontributin e tij në funksion të arritjes së objektivit që janë zgjedhjet e parakohshme. Nëse PD dhe çdo parti tjetër opozitare punon dhe e tregon që është në funksion të këtij qëllimi sigurisht që ne kemi të njëjtin objektiv dhe do të shikojmë të gjitha format e bashkëpunimit”, deklaroi ai.
