Kreu i Bashkisë së Tiranës, Erion Veliaj i ka quajtur shpellarë të gjithë ata që shprehen kundër “Unazës së re”. Veliaj ka shtuar se ata po përdoren si mish për top nga Partia Demokratike.
Lidhur me deklaratat e bëra nga kryebashiaku ka pasur një reagim tejet të veçantë nga ana e gazetarit Agim Xhafka.
Ai merr si shembull rastin amerikan, teksa thotë se nuk prishet asnjë shtëpi në rast se nuk paguhet me vlerën e plotë të tregut, pasi sipas tij atje qytetarët kanë të drejtë të mbrojnë me armë banesat e tyre.
“Erion, e di pse nuk prishen shtëpitë në USA pa u paguar më parë vlera e plotë, cent më cent? Se atje ka një ligj që lejon mbajtjen e armës për të mbrojtur shtëpinë. Kaq. Nxirrni dhe këtu një ligj të tillë e ta shohësh pastaj pçst kur të mendosh të rrafshosh qoftë dhe një avlli”, shkruan Xhafka në rrjetet sociale.
‘’Ndodh çudia ne Tirane. Edhe shtëpitë me hipoteke i vlerësojnë sa për një haur. Të ikën jeta duke e ndërtuar vjen një invador e ta merr para. Po të kesh arme do mbrohesh se shteti qenka bërë njësh me grabitësin. Qeveri mafioze shume po durohet ndaj këtyre armiqve te hapur dhe arrogante”, shkruan më tej Xhafka.
Kujtojmë se banorët e Astirit kanë më shumë se 10 ditë që protestojnë për shkak se do të mbeten pa banesa, duke hedhur kështu poshtë mundin e një jete të tërë, me të cilin kanë ngritur këto godina.
E vetmja zgjidhje që iu është premtuar nga ana e Bashkisë për banorët që i kanë shtëpitë pa legalizuar është pagimi i bonusit të qerasë për një vit, zgjidhje të cilën ata e kanë konsideruar qesharake.
