Aksioni i IKMT në zonën e “Astirit”, ka sjellë një tjetër përplasje të fortë mes qeverisë dhe opozitës jashtëparlamentare. Pavarësisht këmbënguljes së fortë të banorëve, dhe shpërthimit të revoltës edhe ndaj policisë, në këtë zonë u prishën 33 banesa.
Është Edi Paloka, ku me anë të një komenti në Facebook, ka shpërthyer ndaj kryeministrit Rama dhe kryebashkiakut Veliaj. Për të, ata po vjedhin pronën publike për përfitime personale.
Nënkryetari i Partisë Demokratike Edi Paloka, nënvizon se qeveria ka dhunuar në mënyrë barbare banorët e “Unazës së Re”, dhe se këta banorë janë viktimë e aferave korruptive.
Ish-deputeti demokrat paralajmëron kallëzim penal për punonjësit e policisë dhe për IKMT. Sipas Palokës, ata do të përballen shumë shpejt me drejtësinë, dhe do të marrin dënimin e merituar për dhunën ndaj banorëve të “Astirit”.
“Çdo punonjës policie, që i urdhëruar nga Edi Rama, Erjon Veliaj dhe Sandër Lleshi, për të sulmuar në mënyrë kriminale banorët, dhe për t’u rreshtuar në anën e krimit, duhet ta ketë të qartë. Do të trajtohet si kriminel shumë shpejtë. Dita e përballjes me ligjin nuk është e largët.
Partia Demokratike do të depozitojë kallëzim penal për “shpërdorim detyre” dhe “ushtrim dhune”, ndaj çdo drejtuesi dhe punonjësi policie që ka qenë dje në shërbim të krimit, dhe jo në shërbim të ligjit.
Edi Rama dhe veglat e tij në Prokurori mund të vonojnë vënien e drejtësisë në vend, por nuk do t’ia dalin ta pengojnë dot. Korrupsioni me këtë projekt do të ndëshkohet. Dhuna ndaj banorëve do të ndëshkohet”, shkruan ai.
