Një lajm i mirë vjen nga Italia, teksa zona më e prekur nga koronavirusi, Lombardia nuk ka shënuar asnjë viktimë në 24 orët e fundit.
Sipas epidemiologut italian, Vittorio Demicheli ky rezultat ishte i pritshëm pasi njerëzit e infektuar tashmë janë shëruar.
Epidemiologu thekson se numrat do vazhdojnë të zvogëlohen dhe se shkalla në rënie e vdekshmërisë tregon trendin në ulje në Kujdesin Intensiv.
I pyetur se kur në Lombardi do të ketë zero infeksione të reja, epidemiologu italian tha se “nëse tendenca vazhdon të jetë kjo që është tani, brenda dy javësh ne mund të arrijmë në shifra minimale”.
Italia është një nga vendet më të prekura në botë nga koronavirusi, duke regjistruar rreth 230 mijë raste infektimi dhe mbi 32 mijë viktima.
Vendi fqinj renditet i gjashti në botë me numrin më të lartë të rasteve të konfirmuara me COVID-19, pas SHBA-ve, Brazilit, Rusisë, Spanjës dhe Mbretërisë së Bashkuar.
