Ambasadorja amerikane, Yuri Kim është paraqitur këtë të enjte në Prokurorinë e Posaçme rreth orës 12:00, ku ka zhvilluar një takim me prokurorët e kësaj strukture dhe me drejtuesin Arben Kraja.
Ajo ka qëndruar për rreth 30 minuta në SPAK.
“Takova në SPAK Arben Krajën dhe prokurorët për të ritheksuar mbështetjen për punën e tyre të rëndësishme. Pavarësisht kërcënimeve dhe tentativave për nxitje, SPAK është i përqendruar në ofrimin e më shumë rezultateve, që tregojnë se askush, pavarësisht gradës apo pasurisë nuk është mbi ligjin. Jo më pandëshkueshmëri”, shkruan Yuri Kim.
Kujtojmë që sot ishte afati i fundit i dorëzimit të kandidaturave për kreun e SPAK, pas mbarimit të mandatit të Arben Krajës.
Tre prokurorët, Adnan Xholi, Altin Dumani dhe Edvin Kondili kanë paraqitur kandidaturat për kreun e SPAK.
Tashmë KLP pritet të intervistojë tre kandidatët, Adnand Xholi, Altin Dumani dhe Edvin Kondili. Ndërkohë, kreut aktual të SPAK, Arben Krajës i mbaron mandati i tij 3-vjeçar në datën 18 dhjetor.
