Pas vendimit, ish-ministri Tahiri në një prononcim për mediat paralajmëroi se nesër ai do të thotë fjalën e fundit. Në prononimin për mediat, ai e cilësoi qesharak dënimin e dhënë ndaj tij nga Gjykata e Krimeve të Rënda, për “shpërdorim detyre”.
“Meqë ca kushërinj të mi kanë përdorur emrin tim, unë i bie që kam shpërdoruar detyrën. Më lini ta përtyp, nuk qesh dhe nuk qaj dot. Nesër do ju ftoj që të ndajmë ca mendime. Mu duk një gjë që; je i pafajshëm, por s’kemi këllqe që ta themi”, tha ai.
Tahiri tha se për dy vite ishte hetuar si trafikanti më i madh në Shqipëri.
“Dy vite jam hetuar si trafikanti më i madh i Shqipërisë. Si pjesë e një grupi kriminal, që kam bërë trafik droge. Meqë kushërinjtë paskan përdorur emrin tim, unë kam shpërdoruar detyrën.
Zoti ju ruajtë dhe juve, ishalla nuk ju përdor njeri emrin se e hëngrët. Nuk e konsideroj fitore, por maja e betejës sime. Prisni deri nesër edhe mua më duhet kohë ta kuptoj këtë që ndodhi se….Duhet të gjej edhe unë një shteg se si ta lexoj vendimin e gjykatës”, tha Tahiri.
Ai nuk e kurseu ironinë, ndërsa fliste me mediat. “Dy vite keni ndjekur procesin e shekullit, por tani u katandis kokoshi një thelë”.
