Një ditë më parë u vu në pranga Adiola Lakra, 26-vjeç, e dyshuar si bashkëpunëtore në ekzekutimin e 40-vjeçarit Hekuran Billa te Komuna e Parisit, mbrëmjen e 11 qershorit. Vajza ka treguar për policinë se nuk ka pasur asnjë dijeni për planin e vrasjes, dhe kur mësoi se Hekuran Billa ishte vrarë kishte mbyllur çdo rrjet social dhe kishte ndërruar numrin e telefonit.
Pas arrestimit të mikut të saj, Sebastiano Mali, ajo ishte zhvendosur nga Tirana në Berat, ku jetonte në banesën e një shoqeje, aty ku edhe u arrestua.
Gazetari Artan Hoxha ka folur lidhur me arrestimin e autorit të tretë të përfshirë në vrasjen e Hekuran Billës.
I ftuar në studion e “Abc News”, Hoxha ka theksuar se në këtë ngjarje përveç hakmarrjes, një tjetër pistë hetimi që është ajo e grupeve kriminale që kanë përdorur hasmin për vrasje.
“Atentati i Billës dhe ngjarja e Laçit janë dy ngjarje të zbardhura, vetëm ka ngelur për tu kopsitur pazelli. Tek Billa ajo që të bën përshtypje është vendi që kanë zgjedhur autorët, ku grupet e strukturuar, janë më të rafinuar nuk e bëjnë në një vend të tillë. Grupi i hetimit ka dhe një pistë tjetër që vrasja është bërë për hasmëri apo një grup tjetër kriminal ka shfrytëzuar këtë hasmëri dhe ka ngjitur hasmin që të marrë hak dhe e ka nxitur duke e paguar që ta vrasë Billën”, ka thënë gazetari.
