Fuga ka reaguar sërish ditën e sotme përsa i përket zgjedhjeve në Akademinë e Shkencave dhe jo vetëm.
Nëpërmjet një statusi në Facebook, ai deklaron se ligjet e shkelura dhe korrupsioni në Akademinë e Shkencave, apo në universitetet dhe institucionet shkencore duhet të marrin fund.
“Ata që kanë shkelur ligjet në Akademinë e Shkencave apo universitete dhe institucione shkencore, kanë bërë korrupsion, të përgjigjen një ditë!”, shkruan akademiku.
Më poshtë ai sqaron se nuk është anëtar i asnjë partie dhe se e vetmja gjë që atij i intereson, është ‘vendosja e një sistemi qeverisjeje ku pushteti të mos abuzohet nga lloj-lloj individësh.’
Fuga deklaron gjithashtu se mbështet deklaratat e Bashës, se në rastin e ardhjes së opozitës në pushtet, nuk do njihen aktet e bëra në Akademinë e Shkencave dhe deklaratat për shfuqizimin e ligjit të arsimit të lartë, të cilin e quan ‘të mbrapshtë’ dhe ‘kriminal’.
Postimi i plotë i Artan Fugës:
Ata që kanë shkelur ligjet në Akademinë e Shkencave apo universitete dhe institucione shkencore, kanë bërë korrupsion, të përgjigjen një ditë !
——————————
Unë nuk jam anëtar i asnjë partie politike. As demokrat dhe as socialist. As nuk kam ndërmend sot të antarësohen në ndonjë nga këto parti!
Mua më intereson qytetari shqiptar, të drejtat dhe mirëqënia e tij.
Mua më intereson dija universitare, vendosja e universiteteve në rruge të drejtë, kërkimi shkencor që e kanë përdhosur, më intereson dija e të rinjve,integrimi i të diplomuarve në tregun e punës, kultura kombëtare, futja e teknologjisë së lartë në Shqipëri.
Mua më intereson të vendoset një sistem qeverisjeje dhe politike në Shqipëri ku pushteti të mos abuzohet nga lloj lloj individësh rastësorë dhe të padenjë! Mua më intereson drejtësia sociale për të majtë e djathtë, a për ata që nuk duan t’ja dinë për politikën.
Por, në pikën ku ka arritur gjendja në shkencë dhe arsim, unë e mbështes plotësisht deklarimin e bërë dje në Elbasan nga lideri i opozitës, z. Lulzim Basha, se nëse i krijohen mundësitë dhe kushtet, opozita e ardhur në pushtet nuk do të njohi asnjë akt të këtij Kuvendi për Akademinë e Shkencave, nuk do ta pranojë atë si kamzhik të diktaturës kundër lirive universitare, shkencës, dhe se ata që shkelin ligjet dhe Kushtetutën, në përgjithësi dhe në këtë rast, cilëtdo qofshin, do të përgjigjen përpara ligjit dhe do të vihen prapa hekurave!
Sikurse mbështes deklarimin e tij zyrtar se nëse vjen në pushtet, do të shfuqizojë që ditën e parë ligjin e poshtër dhe të mbrapshtë, kriminal, të arsimit të lartë!
A kam besim unë se këto premtime do të mbahen?
Nuk ka rëndësi se çfarë mendoj unë personalisht! Do ta them kur të vijë koha!
Pyetje e kotë!
Llogaria sot është fare e thjeshtë, teknike, e ftohtë, filozofike po të doni:
Nuk fitojmë asgjë po të mos besojmë sepse gjendja ka vajtur në atë pikë saqë cdo sekondë që kalon aq më poshtë bie kultura dhe dija në Shqipëri, aq më shumë poshtërohemi ne si intelektualë, pedagogë, kërkues shkencorë dhe studentë!
Kemi prekur fundin !
Ne këtu jemi për të qenë vigjilentë që politika të mos e tradhëtojë intelektualin, universitarin, studentin, punonjësin shkencor sikurse bën tani !
