Presidenti Ilir Meta duket se po mban peng dekretimin e ministrit të ri të Brendshëm, Sandër Lleshit, propozuar nga kryeministri Rama.
Afati për t’u shprehur është 7 ditë, por duket se kemi të bëjmë me një «ngërç», sa i takon çështjes së Lleshit. Ngërçi qëndron në faktin nëse Lleshi mban një tjetër pozicion në Forcat e Armatosura. Për këtë arsye, Presidenca i është drejtuar me një kërkesë Ministrisë së Mbrojtjes ku kërkon informacion nëse Lleshi mban ende një detyrë shtetërore, ose jo.
Kjo kërkesë e Presidencës bëhet në mbështetje të Kushtetutës së Shqipërisë, në nenin 103 ku thuhet: “Ministri nuk mund të ushtrojë asnjë veprimtari tjetër shtetërore dhe as të jetë drejtues ose anëtar i organeve të shoqërisë civile. Ministri nuk mund të ushtrojë asnjë veprimtari tjetër përveç detyrës së tij si ministër”.
