Mbretëresha e Britanisë së Madhe, Elizabeth II feston sot ditëlindjen e saj, duke mbushur plot 94 vjeç.
Por që prej marrjes së fronit, mbretëresha feston dy ditëlindje. Që nga shekulli i 18-të, për monarkët britanikë mbahet dhe një e ashtuquajtur “ditëlindje zyrtare”, e madje tendenca është të festohet më shumë ajo sesa data e vërtetë.
Kremtimi i ditëlindjes tjetër do të jetë në muajin qershor. Sipas mediave të huaja, arsyeja pse është vendosur një kremtim i dytë në verë, është se askush nuk dëshiron ta festojë ditëlindjen në shi. Për këtë arsye, që prej vitit 1740, ditëlindja e monarkut, festohet dy herë.
Elisabeta merr zakonisht një përshëndetje tradicionale armësh në ditën e saj të lindjes, por për herë të parë në sundimin e saj 68-vjeçar, këtë radhë duket se ajo do të mungojë, për shkak të situatës nga koronavirusi.
Në ceremoninë ekstravagante të qershorit, zakonisht rrugët përreth Buckingham Palace mbushen me kureshtarë e turistë ndërsa zhvillohet një paradë me 1.400 ushtarë, 200 kuaj dhe 400 muzikantë, ndërsa mbretëresha vetë do të vazhdojë të lëvizë me karrocë të mbyllur.
Mbretëresha Elizabeth II ka lindur më 21 prill të vitit 1926 në Londër dhe ishte fëmija i parë i Dukës dhe Dukeshës së York-ut (më vonë Mbreti George VI dhe Mbretëresha Elizabeth I).
Ajo u martua në vitin 1947 me Philip që në atë kohë ishte Duka i Edinburgh. Ajo ka katër fëmijë: Charles, Anne, Andrew, Edward.
Mbretëresha Elizabeth II e mori fronin në moshën 26-vjeçare, kur babai i saj Mbreti George VI ndërroi jetë.
