Një punonjës policie ka rënë në prangat e kolegëve të tij. Ai akuzohet se ka dhënë ndihmë për kalim të paligjshëm të kufirit. Mbrëmjen e djeshme është vënë në pranga punonjësi i policisë me inicialet G.H.
Shtetasi në fjalë, duke udhëtuar me automjetin e tij është ndaluar nga shërbimet e Komisariatit të Policisë Pogradec në dalje të qytetit.
Nga kontrolli ka rezultuar se me automjetin e tij po transportonte dy migrantë sirianë, të cilët i ka marrë në dalje të qytetit të Bilishtit për t’i dërguar drejt Tiranës, kundrejt shpërblimit prej 70 eurosh.
“Në datë 18 gusht 2020, ora 23:40 u arrestua në flagrancë G.H., me detyrë punonjës policie SPZ në Komisariatin e Policisë Nr. 4 Tiranë. 24 vjeçari akuzohet për veprën penale “Ndihmë për kalim të paligjshëm të kufijve”.
Ky shtetas duke udhëtuar me automjetin e tij, është ndaluar nga shërbimet e Komisariatit të Policisë Pogradec në dalje të qytetit.
Nga kontrolli ka rezultuar se me automjetin e tij po transportonte dy migrantë sirianë, të cilët i ka marrë në dalje të qytetit të Bilishtit për t’i dërguar drejt Tiranës kundrejt shpërblimit prej 70 eurosh.
Në cilësinë e provës materiale u sekuestrua automjeti, karta ID, patenta, pistoleta TT, 450 euro, 10 mijë lekë, 3 telefona celularë”.
