Një shqiptar, i cilësuar si “Pablo Escobar” i Tiranës, është arrestuar nga policia italianë bashkë me të dashurën e tij, pasi iu gjetën në automjet 22 kilogramë hashash dhe marijuanë.
Në sallone gjyqit ka dalë e dashura e 36-vjeçarit, ndërsa shqiptari pritet të dalë në gjykatë në muajin dhjetor.
Shtëpia e çiftit ishte vënë në vëzhgim prej kohësh, ndërsa karabinierët zbuluan një makinë të dyshimtë jashtë apartamentit, ku është kryer shkarkimi i një ngarkese që më pas rezultoi të ishte drogë.
Pakot e mëdha të drogës u gjetën të fshehura në një dollap në ballkonin e apartamentit, ndërsa gruaja deklaroi fillimisht se ishte mysafire në banesë. Megjithatë, pas hetimeve rezultoi ndryshe, teksa ajo kishte një kartë identiteti false.
Mediet lokale nuk japin emrin e shqiptarit, ndërsa shkruajnë se ai ishte angazhuar fuqimisht në trafikun ndërkombëtar të drogës të destinuar kryesisht për në krahinën e Brescia-s dhe në përgjithësi në Italinë veriore dhe se konsiderohet si një prej bosëve më të kërkuar të narkotrafikut në Evropë.
Mësohet se 36-vjeçari është pronar i një zinxhiri klubesh të natës dhe ndodhej nën një urdhër arresti evropian.
Policia i ka gjetur edhe 36-vjeçarit një kartë të rreme identiteti, ndërsa hetimet zbulojnë se ai ka mbajtur marrëdhënie me eksportues shqiptar të drogës dhe shitës italianë në mes të Brescia, Milanos dhe Bergamos.
