Kushëriri i Ministres së Arsimit, Besa Shahini, ka rënë në prangat e policisë. Policia e Kosovës ka arrestuar biznesmenin Imer Shahini, i cili është kushëriri i Ministres së Arsimit.
Shahini prej disa vitesh ishte i shpallur në kërkim edhe nga FBI-ja, pasi ndaj tij rëndojnë akuzat për mashtrim parash me shuma deri në miliona euro. Sipas mediave kosovare, Shahini, në bashkëpunim me gjashtë persona të tjerë, disa prej tyre të arrestuar, akuzohen se ilegalisht kanë përfituar 20 milionë dollarë përmes mashtrimit. Pas procedurave të arrestimit të tij, ai pritet që të ekstradohet drejt SHBA-së për t’u përballur me drejtësinë atje.
Në këtë aksion të policisë në Fushë-Kosovë janë arrestuar edhe Binak Gjergjajn dhe Ramiz Borduniqin, po ashtu të kërkuar nga Shtetet e Bashkuara të Amerikës.
Skema e mashtrimit
Shahini nëpërmjet mashtrimit donte të merrte nën kontroll aksione të kompanisë ‘Gerova Financial Group Ltd’. Qëllimi ishte që ai këto aksione t’i shiste fshehurazi, nga kjo fitonte shuma të mëdha parash. Por një pjesë të këtyre aksioneve të kalonte në pronësinë e tij.
Në këtë skemë mashtrimi ai është ndihmuar edhe nga vëllezërit Galanis, po ashtu të akuzuar nga FBI-ja për mashtrim, të cilët ishin përkujdesur t’ia hapnin një llogari Shahinit, ‘Shahini Accounts’, ku do të kaloheshin aksionet e shitura fshehurazi në mënyrë që në ‘Gerova’ të mos vihej re se kush ishte pronari i vërtetë i tyre.
Për rrjedhojë, njëri prej vëllezërve Galanis, Jason, do të vazhdonte ta mbante nën kontroll kompaninë ‘Gerova’, duke përfituar gjithashtu miliona para.
