Ish-konkurrentja e “It’s my home” është vënë në pranga, pasi dyshohet se sulmoi një polic. Ky emision ka marrë përmasa të mëdha, për shkak të dhunës që promovohet.
Mediat në Kosovë raportjnë se një zyrtar policor është sulmuar nga një konkurrente e këtij programi, e cila u përjashtua mbrëmë nga “It’s my home” .
Burimet nga Prokuroria kanë bërë të ditur se bëhet fjalë për 28-vjeçaren, Teuta Llumnica, e cila tashmë është arrestuar dhe ndodhet nën ndalim policor.
Teuta, para pak ditësh ishte viktimë e dhunës fizike. Dyshohet se ajo ka shkaktuar telashe, duke i sulmuar banorët e shtëpisë.
Për rrjedhojë, produksioni e largoi nga shtëpia, por paraprakisht hasën në rezistencë. Kjo ka bërë që policia të zbarkojë sërish në selinë e “First Channel”, dhe ta shoqërojë të dyshuarën deri te banesa e saj. Por nuk mbaroi me kaq. Sjelljet e saj dhe agresiviteti që dyshohet se ka shfaqur gjatë rrugës, e detyruan policinë që ta prangosin. Dhuna kulmoi kur një zyrtar policor u godit nga e dyshuara Lluminca, e cila menjëherë u arrestua dhe u dërgua në rajonin policor.
Burimet thonë se polici që u sulmua ka pësuar lëndime trupore, dhe ka marrë trajtim mjekësor në spital. Në anën tjetër, pasi janë kryer procedurat policore, me urdhër të Prokurorit të Shtetit e dyshuara është dërguar në burg për 48 orë, për veprën penale “Sulm ndaj personit zyrtar”.
