Ish-kryebashkiaku Fatos Tushe e ka ditur që ka qenë nën hetim. Gazetarja Klodiana Lala ka zbuluar detaje në lidhje me këtë hetim. Sikundër vihet re edhe nga përgjimet, Tushe dhe drejtuesit e tjerë të Bashkisë kanë qenë në dijeni ndaj hetimit të Strukturës së Posaçme Anti Korrupsion. Për këtë arsye, kishin nisur përgatitjet për të kamufluar aktin korruptiv me në fokus një tender me vlerë 24 milionë lekë, për rehabilitimin e kanaleve vaditëse në rrethinat e Lushnjes.
Gazetarja Klodiana Lala është shprehur se në filtrin e SPAK-ut, është dhe një tjetër tender, ai i naftës. Në përgjime është folur dhe për favorizime të drejtuesve në këtë drejtim.
“Pas dy orësh ka rifilluar seanca në Gjykatë për masën e sigurisë të Tushes. Gjithashtu janë dhe 8 vartës dhe 2 biznesmenë të favorizuar në SPAK. Ndërprerja u bë pasi avokatët kërkuan të njihen me dosjen voluminoze.
Përgjimet janë provat që SPAK ka ndaj Tushes, ai bisedon me Ibrahim Lamin dhe shihej si favorizohej tenderi. Në momentin që zyrtarët kanë mësuar se SPAK ka nisur hetimet, kryebashkiaku i kishte orientuar ata se si t’i përgjigjej prokurorëve.
Sa i përket personave të tjerë të dyshuar, dëgjohet Ibrahimi flet me Lamin, duke thënë se do të shkonte SPAK-u, që nënkupton se po përgatiteshin. SPAK do të kërkojë që kryebashkiaku të qëndrojë prapa hekurave, ai dhe biznesmenët. Duhet theksuar që krahas tenderit me vlerë 24 milionë lekë për rehabilitimin e kanaleve vaditëse, SPAK ka në filtër dhe një tender të karburantit”, tha Lala.
Nga bisedat zbulohet se biznesmenët e vënë në pranga Bujar Murati dhe Ibrahim Lami janë kushërinj me njëri-tjetrin, si dhe janë miq me kryebashkiakun e Lushnjes Fatos Tushe dhe drejtorin e Ndërmarrjes Publike, Flamur Peqini. Dhe kështu pavarësisht se fituesi i tenderit ka rezultuar Bujar Murati, punimet janë kryer nga firma e Ibrahim Lamit. Në përgjime, zbardhen momente nga biseda e tyre për tenderin korruptiv për rehabilitimin e një kanali ujitës.
