Drejtori i Përgjithshëm i Policisë së Shtetit, Ardi Veliu ka folur në lidhje me arrestimin e të rrezikshmit nga Lushnja, Orges Bilbili.
I ftuar në emisionin “Kjo Javë” në News 24, Veliu tha se forcat RENEA kanë zhvilluar 7 operacione për arrestimin e tij.
Në të gjitha këto operacione sekrete, Orges Bilbili dhe shoku i tij Laert Haxhiu kanë shpëtuar.
Sa i përket arrestimit dhe qëllimit të tij nga policia, Veliu tha se punonjësi i policisë në këtë rast është treguar profesionist dhe i është përmbajtur të gjithë protokollit.
“Punonjësit e policisë kanë mision dhe detyrë që në çdo kohë që ballafaqohen me element krimi të bëjnë gjetjen dhe kapjen e tyre. Punonjësi në këtë rast bëri detyrën, kishte përballë një person të armatosur që madje që i drejtoi armën. Ai u tregua si profesionist, reagoi më shpejt. Në këtë situatë fatkeqësisht patëm një person të dëmtuar, i kërkuam falje, e takuam në spital. Është një ngjarje që nuk duhet të ndodhte, por punonjësi i policisë ka qenë brenda të gjitha protokolleve që përcakton përdorimi i armës së zjarrit në kushtet e vetëmbrojtjes”, tha Veliu.
I pyetur nëse kishin informacion për vendndodhjen e tij, Veliu tha: “Numri i personave në kërkim të kapur ka qenë i admirueshëm këto ditë. Edhe për personin në fjalë janë organizuar disa operacione, jo në të gjitha operacionet janë të suksesshme, edhe për këtë rast apo person janë organizuar disa operacione, ne kemi pasur informacione për vendndodhjet e tyre, pra kanë qenë në vende të ndryshme dhe nuk ia kemi dalë ti kapim në raste të tjera”.
